ਰੋਮ, 5 ਨਵੰਬਰ 2026 – ਮਨੁੱਖੀ ਤਸਕਰੀ ਅਤੇ ਗੰਭੀਰ ਸ਼ੋਸ਼ਣ ਵਿਰੁੱਧ ਲੜਾਈ ਨੂੰ ਮਜ਼ਬੂਤ ਕਰਨਾ ਅਤੇ ਪੀੜਤਾਂ ਨੂੰ ਵੱਧ ਸੁਰੱਖਿਆ ਦੇਣਾ — ਇਹ ਹੈ 2026-2028 ਲਈ ਨਵੀਂ ਰਾਸ਼ਟਰੀ ਕਾਰਜ ਯੋਜਨਾ (Piano nazionale d’azione) ਦਾ ਮਕਸਦ। ਇਟਲੀ ਦੀ ਮੰਤਰੀ ਪ੍ਰੀਸ਼ਦ (Consiglio dei ministri) ਨੇ ਇਹ ਯੋਜਨਾ 28 ਅਕਤੂਬਰ ਨੂੰ ਮਨਜ਼ੂਰ ਕੀਤੀ, ਜੋ ਮੰਤਰੀ ਏਊਜੇਨੀਆ ਰੋਕੇਲਾ (Eugenia Roccella) ਅਤੇ ਮਾਤੇਓ ਪਿਆਂਤੇਦੋਸੀ (Matteo Piantedosi) ਵੱਲੋਂ ਪੇਸ਼ ਕੀਤੀ ਗਈ ਸੀ।
ਇਹ ਯੋਜਨਾ ਚਾਰ ਮੁੱਖ ਹਿੱਸਿਆਂ ’ਤੇ ਆਧਾਰਿਤ ਹੈ: ਰੋਕਥਾਮ, ਅਪਰਾਧਾਂ ਵਿਰੁੱਧ ਕਾਰਵਾਈ, ਪੀੜਤਾਂ ਦੀ ਸੁਰੱਖਿਆ ਤੇ ਸਹਾਇਤਾ, ਅਤੇ ਅੰਤਰਰਾਸ਼ਟਰੀ ਸਹਿਯੋਗ।
ਸ਼ੋਸ਼ਣ ਦਾ ਸ਼ਿਕਾਰ ਲੋਕਾਂ ਦੀ ਸਮੇਂ ਸਿਰ ਪਛਾਣ ਉੱਤੇ ਖ਼ਾਸ ਧਿਆਨ ਦਿੱਤਾ ਜਾਵੇਗਾ। ਸਭ ਤੋਂ ਕਮਜ਼ੋਰ ਵਰਗਾਂ — ਜਿਵੇਂ ਔਰਤਾਂ, ਨਾਬਾਲਗ ਬੱਚੇ ਅਤੇ ਅਪਾਹਜ ਵਿਅਕਤੀ — ਲਈ ਵਿਸ਼ੇਸ਼ ਕਦਮ ਚੁੱਕੇ ਜਾਣਗੇ।
ਯੋਜਨਾ ਵਿੱਚ ਅਪਰਾਧਿਕ ਗਿਰੋਹਾਂ ਵਿਰੁੱਧ ਜਾਂਚ ਨੂੰ ਹੋਰ ਤੇਜ਼ ਕਰਨ ਦੀ ਵੀ ਗੱਲ ਹੈ, ਤਾਂ ਜੋ ਸ਼ੋਸ਼ਣ ਲਈ ਡਿਜੀਟਲ ਤਕਨਾਲੋਜੀ ਦੀ ਵਰਤੋਂ ਨੂੰ ਵੀ ਰੋਕਿਆ ਜਾ ਸਕੇ।
ਇੱਕ ਹੋਰ ਅਹਿਮ ਨੁਕਤਾ ਹੈ ਉਨ੍ਹਾਂ ਦੇਸ਼ਾਂ ਨਾਲ ਸਹਿਯੋਗ ਵਧਾਉਣਾ ਜਿੱਥੋਂ ਪੀੜਤ ਆਉਂਦੇ ਹਨ ਜਾਂ ਜਿਨ੍ਹਾਂ ਰਾਹੀਂ ਲੰਘਦੇ ਹਨ, ਕਿਉਂਕਿ ਇਸ ਸਮੱਸਿਆ ਪਿੱਛੇ ਅਕਸਰ ਅੰਤਰਰਾਸ਼ਟਰੀ ਅਪਰਾਧਿਕ ਨੈੱਟਵਰਕ ਹੁੰਦੇ ਹਨ।
ਇਸ ਤਰ੍ਹਾਂ ਨਵੀਂ ਯੋਜਨਾ ਦਾ ਟੀਚਾ ਇਟਲੀ ਦੇ ਰੋਕਥਾਮ, ਸੁਰੱਖਿਆ ਅਤੇ ਸਹਾਇਤਾ ਪ੍ਰਬੰਧ ਨੂੰ ਹੋਰ ਅਸਰਦਾਰ ਬਣਾਉਣਾ ਹੈ, ਅਤੇ ਸ਼ੋਸ਼ਣ ਤੋਂ ਬਚਾਏ ਗਏ ਲੋਕਾਂ ਲਈ ਸਮਾਜਿਕ ਸ਼ਮੂਲੀਅਤ ਅਤੇ ਆਤਮ-ਨਿਰਭਰਤਾ ਦੇ ਰਾਹ ਖੋਲ੍ਹਣਾ ਹੈ।
